Ақтөбедегі аудан әкімі суицидке барған бас дәрігердің өзін кінәлау себебін түсіндіріп берді

Ақтөбе облысында өзіне қол салған аудандық аурухана бас дәрігерінің өліміне қатысты Әйтеке би ауданының әкімі алғаш рет мәлімдеме жасады. Дәл осы шенеунікті марқұм ақырғы хатында кінәлап кеткен еді. Аманғали Бердалин үш жыл бойы осы оқиғаға қатысты неліктен жақ ашпағанын айтып ақталды. Бұл туралы КТК арнасы хабарлады. 

Бас дәрігерді жалдамалы пәтерде асылып тұрған жерінен бауыры тауып алған болатын. Тілімдей қағазға аудан әкімі мен ауруханадағы өзінің орынбасарының атын жазып қалдырды. Марқұмның туыстары шенеуніктерді жазалауды талап етіп бірнеше жыл арызданғанымен, кейін райларынан қайтыпты. Ал дәрігердің өз-өзіне қол салуының себебі ақыры ашылған жоқ. Сол уақыттан бері тілшілерден қашқақтап жүрген Аманғали Бердалин облыс орталығында өткен есеп беру жиынында ағынан жарылды. Айтуынша, марқұм Ерназар Шағыровпен жақсы араласқан. Оны басқармадағылар жұмыстан қуған кезде араша түсе алмапты. Марқұм сол үшін өкпелеген болар деп отыр әкім.

- Оны ауданға бас дәрігер етіп тағайындағанда мен қолдау көрсеттім. Үй бөліп, аудандық мәслихатқа депутат қылып сайладық. Ал денсаулық сақтау басқармасы жұмыстан шығарған кезде әкім ретінде араша түсер деп күткен болар,-деді Әйтеке би ауданының әкімі  Аманғали Бердалин.