Астанада халық санының миллионға жетуі қазақстандықтардың күлкісін келтірді
Бүгін еліміздің бас қаласы Астанада миллионыншы тұрғынның дүниеге келгені туралы ақпарат тарап, жұртшылық қуанған болатын. Алайда бұл статистикаға күдікпен қарағандар саны басым. Себебі олар небәрі екі айда астаналықтар санының 120 мыңға артуы мүмкін емес дегенді айтып отыр. Бұл әсіресе әлеуметтік желілерде қызу талқыланып, мұндай статистиканы мазаққа айналдырғандар да табылды. Тіпті бірі өткен жылдың қыркүйек айында Астанада жаппай бала көтеру науқаны орын алды деп қалжыңдап жазған. Басым көпшлігі мұндай мәліметті таратқан биліктен ел алдына шығып, аз ғана уақыттың ішінде халық санының бұлайша артуын түсіндіріп беруді талап етіп отыр. Олардың қатарында танымал саясаткер Айдос Сарым да бар.
"Астанадағы халық санының бірнеше айда 120 мыңға артуы қалайша? Себебі неде? Өткен жылдың қыркүйегінде тұрғындар неліктен балалы болуға ерекше құлшынған? Әлде тосын сый жасағысы келді ме? Мүмкін цифрды әдейі солай көрсеткен бе? Егер расымен де солай болса, бұл қызметтік қылмыс. Мұнда елдің бүкіл экономикасына деген сенім жатыр" деп жазды өз парақшасында саясаткер. Желі қолданушысының бірі "флешмоб ұйымдастырған ғой сол қыркүйекте Астана тұрғындарын миллионға жеткізейік деген" деп пікір жазып үлгерді. Қысқасы, бұл статистикаға күмәнмен қарағандар қатары көп. Мұны Елбасы мен Астананың туған күні қарсаңында қолдан жасалынып отырған сценраий деп бағалаушылар да жоқ емес.
Айта кетейік, былтыр қазан айындағы статистикаға сенсек, бас қалада 868 мыңдай халық тұрған. Сондай-ақ, статистикалық мәліметте күніне Астанада 70-80 сәби өмірге келетіні жазылған. Демек айына астаналықтар қатары 2400-ге артады. Ал содан бері 8 ай өткендіктен, олардың қатары 19 200-ге артуы тиіс болатын. Расымен де бұл статистика көңілге күмән келтірмей қоймайды екен.
Пікірлер
