«Қазақстандықтар» Қабатовтың қазақты одан әрі мазақ еткенін қалап отыр

Бір ұққанымыз, халық Тұрсынбектің қазақты бұдан әрі де сынай түскенін қалайды екен. Бейшара, сорлы етіп көрсетсе қазақ түзелетін көрінеді. Орысты мақтап, қазақты түкке алғысыз қылғанның түк айыбы жоқ екен. Міне, біздің халықтың пікірі осы. Елдің Тұрсынбекке деген махаббатының шексіз екенін түсінеміз, әрине. Және Тұрсынбекті жек көріңдер деп отырғанымыз жоқ. Дегенмен, өзімізді сорлы ете бергеннен не шығады? Қазақты кінәлай бергеннен басқа тақырып жоқ па? Қазақтың қолы аузына жеткені кеше емес пе? Енді ел болып, аяққа тұрған баладай ғой. Оны не деп сынайсың? Оны не деп күстәналайсың? Иә, орыстан мықты емес, сол орыстың боданы болған халықпыз. Олар 300 жылдан бері қазаққа жоғарыдан қарап, өктем сөйлеп, қарсы шыққанын атып, асып, итжеккенге айдаған. Теперіштің көкесін көрсеткен. Әбден езіліп, енді ояна бастаған өз қаныңды осылай түкке алғысыз қылу ата-баба әруағына түкіру, солар көрген қорлықты жоққа шығару, сол қорлықты көрсеткендердің алдында тағы бір мәрте жығып беру емес пе? Қазақты мазақ еткеннен басқа тақырып жоқ па? 

Көп қазақтың бірі ретінде мереке мен думандарда, тіпті сенбі мен жексенбіде эфирден жүзі жиі «жылт» ететін азаматымыздың жеткен биігіне біз де қуанамыз. Ол туралы «Болар елдің баласы бірін-бірі батыр дейді» деп мақаламызда да жазғанбыз. Біздегі мақсат қашанда көзбен көріп, құлақпен естіген пікірді жеткізу. Корреспондент газеті Қабатовтың жеке басына күйе жағып, жеке өміріне қол сұғып отырған жоқ. Ақын, Қазақстанның халық жазушысы Қадыр Мырза Әлінің жанында біз кімбіз, оның «Иірімінің» жанында біздің жазғанымыз не тәйірі... Естеріңізде болса, «Иірімде» қазақтың біртуар азаматтары Абай Құнанбаев пен Ғабит Мүсіреповтерден бастап қаншама адамның пендешілігі айтылған. Әрине, жақында ғана әлеуметтік желілерде қызу талқыланып жатқан «Өмір сабақтарының» тележүргізушісі, «Бауыржан шоудың» негізін салған, Тұрсынбектің әріптесі, әйгілі Бауыржан Ибрагимовтің қонақ үйдегі бейәдеп сөздерін осындай пендешілікке санадық. Әңгіме жеке басқа қатысты болғанда кешіріммен қарағанымыз жөн шығар... Ал енді сөз қазақ өнері мен шығармашылығына, қазақтар туралы әзілге келгенде үнсіз қала алмаймыз. 

Тұрсынбекті Тұрсынбек еткен кім? Көрермен. Көрермен болғанда да 100 пайыз қарапайым қазақтан құралған көрермен. Оны өзі де үнемі айтып жүреді. Жалпы, өнерде жүрген кез келген адамның бағын ашатын да, құтын қашыратын да көрермені, тыңдарманы. Олай болса, киелі сахнаның биігіне қарапайым халықтың арқасында көтерілген өнер иелері өз елінің, халқының жаманын жасырып, жақсысын асыруды үйренсе екен дейміз. Бізде басқа ниет те, тілек те жоқ.