Бос жер жау шақырады немесе солтүстікті қазақыландырмасақ, соңы неге соқтыруы мүмкін?
Қырымда референдум өтіп, Донецк пен Луганск облыстары өздерін халықтық республика деп жариялап, Украина дүрбелеңнен бас көтере алмай тұрған шақта «Мәскеу мұнымен тоқтамайды, енді Қазақстанның солтүстік облыстарына ауыз салады, өйткені ол жақта орыс тілінде сөйлейтін тұрғындардың үлесі басым...» деген сықылды небір қиямпұрыс мақалалардың ғаламторды шарлап кеткені есіңізде шығар. Қандай қисынға салсаңыз да, бұл тегін әңгіме емес. Империя болуды көксейтін Ресейдің түпкі пиғылынан хабар береді. Кремльді былай қойғанда, ондағы халықтың басым бөлігі еліміздің солтүстік аймақтарын орыстыкі санайды, «біздің жеріміз» деп ұғынады. Кешегі Солженициндердің, бүгінгі соның ізбасарлары Дугин, Лимонов, Жириновскийлердің талап-тілектері – осы жерлерді қайтсе де Ресейге қосып алу. Бұған Қазақстанның Ресеймен шекаралас аумақтарында тұратын орыс түгілі кейбір қазақтар да кетәрі емес секілді. Демек, Украинадағы жағдайдан сабақ алып, өз ішімізге үңіліп, болып жатқан аса күрделі үдерістер мен үрдістерді қазақ мүддесі, қазақ мемлекетінің мүддесі тұрғысынан дұрыс талдап, нәтиже шығаруымыз һәм сергек әрекет етуіміз қажет-ақ.