Қаншалықты рас, өтірігін қайдам, ел аузында «Хатшылықтан босаған ОҚО мәслихатының депутаты Қамытбек Айтөреев бұрынғы лауазымын аңсайтын көрінеді. Оның үстіне Шардара ауданы әкімінің орны да біраздан бері бос тұр, соған тағайындалуға қам-қарекеті бар сияқты» деген әңгіме жүр.

«Бұл – біздің ғана емес, жақын жерден қант жейміз деп жүрген мыңдаған адамның көкейіндегі сауал» десек артық емес. Осыдан бес жыл бұрын алаулатып-жалаулатып жүріп ашқан қант зауыты жылға жетпей жабылып қалған-тұғын. Бүгінде есігін қара құлып күзеткен жаңа нысанның қайта ашылуын күтіп жүргендер көп. Алғашқыда арнайы маман жетіспеуіне байланысты уақытша жабылған зауыт араға көп уақыт салмай, қайта іске қосылатын болған. Қант зауытының тілін білетін маман тапшы ма, әлде шикізат болмады ма, әйтеуір уақытша деп жабылған зауыт бүгінде тозуға айналды.

Бұрындары дімкәс балалар өте сирек кездесетін. Бүгінде жақсы жетілмеген жасөспірімдер жайлы жиі айтылатын болды. Жарымжан көңілін жабырқаған болып, ауыруы туралы жұмсартып айтамыз. «Мүмкіндігі шектеулі азаматтар» дейміз. Туылмай жатып арбаға таңылған тағдырлардың мөлдіреген жанарлары жүректерді ауыртады. Бірақ, аяғаннан басқа амалың, мүсіркегеннен басқа мүмкіндігің жоқ. Тіпті, әр оныншы баланың осылайша ауру болып туылуын қалыпты жағдай деп қабылдайтын болдық. Бұл түрімізбен көп өтпей-ақ мүгедектері ең көп мемлекетке айналып кетпейміз бе? Соңғы кезде жарымжан балалар неге көбейіп кетті? Түрлі аурулардың асқынып бара жатқаны экологиялық жағдайдың ауырлығынан емес пе?

Шардара қаласындағы көпқабатты үйлерді күрделі жөндеу мемлекеттік бағдарлама бойынша жүзеге асып жатыр. Қанша жылдан бері қараусыз қалған үйлер әктеліп, сырланған соң әдемі кейіпке келіп қалды. Алдын ала айтылғанындай, жөндеу жұмыстарының шығынын тұрғындар он бес жылға бөліп төлеуге тиіс. Бірақ, бар болғаны екі қабаттан тұратын он екі пәтерлік үйдің сыртын сырлап, подъезге салынған есік-терезе үшін 8 млн. теңге жұмсалды дегенге тұрғындар сенбейді.